Í morgun hófst verkefnið „Hjólað í vinnuna“ sem Ólympíusamband Íslands stendur fyrir. Markmið átaksins er að vekja athygli á hjólreiðum sem heilsusamlegum, umhverfisvænum og hagkvæmum samgöngumáta. Nemendur Fossvogsskóla hafa undanfarið verið duglegir að koma á hjóli og ganga í skólann en öll met voru slegin í morgun. Við talningu kl. 09:15 í morgun voru 177 reiðhjól og 13 hlaupahjól í hjólastæðum skólans eða 190 hjól. Þetta þýðir að um 70% nemenda koma á hjóli þegar tekið er tillit til 6 ára nemenda sem ekki hafa heimild til að hjóla á almanna færi.
Við rifjum upp reglur skólans um hjólreiðar því aldrei er of varlega farið.
Göngum eða hjólum í skólann – Reglur um hjólreiðar
Skólinn hvetur nemendur til þess að ganga eða hjóla í skólann og minnka þannig umferð við skólann á morgnana. Með því að draga úr umferð að skólanum, minnkum við bensíneyðslu og síðast en ekki síst stuðlum að heilbrigðri hreyfingu.
Til þess að auka öryggi nemenda hefur skólinn sett reglur um hjólreiðar:
- Samkvæmt umferðarlögum er sex ára börnum og yngri ekki heimilt að hjóla á almannafæri.
- Foreldrar skulu velja fyrir börnin sín heppilegustu leiðina í skólann, benda á þá staði sem geta verið hættulegir og hvetja þau til að hjóla á gangstéttum eða hjólreiðastígum.
- Foreldrar og nemendur bera ábyrgð á að reiðhjólin séu í lagi og þau læst. Hjólið er á ábyrgð foreldra og nemenda.
- Skólinn mælist til að börnin komi ekki á reiðhjóli í skólann í svartasta skammdeginu (nóvember – febrúar) og þegar hálka og snjór er á götum.
- Foreldrar skulu sjá til þess að þeir sem koma á reiðhjóli í skólann noti öryggishjálm.
- Vegna öryggis nemenda er ekki er leyfilegt að hjóla á reiðhjóli, hlaupahjóli, línuskautum eða hjólabrettum á skólatíma eða frímínútum á skólalóðinni. Það skapar slysahættu meðan aðrir eru að leik á skólalóðinni.
Mostly Cloudy (39oF • 4oC)
