Miðvikudaginn 8. september kl. 10:00 hefur Fossvogsskóli ásamt Snælandsskóla verið beðinn um að taka þátt í formlegri opnun verkefnisins Göngum í skólann. Þetta er fjölþjóðlegt verkefni sem Íslendingar taka þátt í nú í fjórða sinn (sjá www.iwalktoschool.org og http://www.gongumiskolann.is/um-gongum-i-skolann/). Aðilar að verkefninu eru ÍSÍ, sem hefur framkvæmdina á höndum, Lýðheilsustöð, Menntamálaráðuneyti, Umferðarstofa, Heimili og skóli, Landsbjörg og ríkislögreglustjóri. Hingað til hefur verkefnið verið formlega opnað utan höfuðborgarsvæðisins en ákveðið var að óska eftir í ár að þessir tveir skólar verði með í þeirri athöfn.
Nemendur í 2. og 7. bekk beggja skóla verða við athöfnina sem er ekki fjölbreytt eða löng. Það er fyrst og fremst verið að vekja athygli fjölmiðla á verkefninu. Það verða stutt ávörp, ráðherra eða einhver annar frá þessum aðilum og e.t.v. frá bæjarfélögunum, síðan fá börnin íspinna í boði MS og að því búnu fara þau í ratleik um dalinn. Fullorðnum verður boðið upp á kaffi í sal Fagralundar, nýja íþróttamannvirki HK. Til þess að vera miðsvæðis milli skólanna var ákveðið að fá leyfi til þess að vera með þessa formlegu opnun á grasvelli HK, austan Fagralundar.
Að sjálfsögðu munu aðrir nemendur skólanna taka þátt í þessu verkefni á einhvern hátt enda hafa skólarnir verið með frá upphafi en þetta er fjórða árið sem Íslendingar eru með.
Á næstu vikum fer fram heildarmat á skólastarfi í Fossvogsskóla, en samkvæmt lögum um grunnskóla 91/2008 35. gr.- 38. gr. er gert ráð fyrir bæði innra og ytra mati og eftirliti á gæðum starfs í grunnskólum. Með ytra mati er átt við úttekt á starfsemi stofnunar sem unnin er af utanaðkomandi aðilum, s.s. sveitarfélögum og/eða menntamálaráðuneyti.
Það er stefna Fossvogsskóla að hvetja nemendur að koma gangandi eða hjólandi í skólann en við leggjum áherslu á lýðheilsumál. Undanfarna daga hafa nemendur verið duglegir að hjóla í skólann og í síðustu viku voru 172 reiðhjól í hjólreiðagrindum fyrir utan skólann en nemendur skólans eru rétt rúmlega þrjú hundruð. Við viljum minna nmendur á að nota hjálm.
Tilhlökkunin skein úr litlum andlitum þegar nemendur í 1. bekk hófu sína skólagöngu í gær. Dagurinn var varla byrjaður þegar krakkarnir spurðu hvort þau ættu nú ekki að fara að fá bækur og greinilegt að þau hlakka til þess að takast á við ný verkefni. Það fer ekki á milli mála að hér eru áhugasamir nemendur á ferð og við hlökkum sannarlega til að vinna með þeim í vetur.
Mostly Cloudy (59oF • 15oC)
